Напрыканцы лютага ў беларускім стартап-хабе запусцілі новы праект Imaguru Industry Hack. Партнёрам першай сустрэчы, удзельнікі якой гаварылі пра інавацыі ў foodtech і retail, стала «Лідскае піва».
Нашу кампанію на гэтай сустрэчы прадставіў галоўны півавар Алег Малахаў і кіраўнік аддзела маркетынгу Валянціна Багнія. Яны прапанавалі паразважаць над развіццём foodtech індустрыі ў Беларусі і свеце, выкарыстаннем інавацый на буйным прадпрыемстве, незвычайнымі інструментамі прасоўвання алкагольных брэндаў.
— Наватарства для «Лідскага піва» на працягу ўсёй гісторыі было асноўным напрамкам, — распавёў галоўны півавар кампаніі Алег Малахаў. — Заснавальнік лідскага піўзавода Носель Пупко і яго нашчадкі былі стартаперам свайго часу. Менавіта на на нашым прадпрыемстве з’явілася першая ў горадзе тэлефонная лінія, што дазваляла максімальна хутка абменьвацца інфармацыяй. Падчас Першай сусветнай вайны на заводзе пачалі выпускаць прадукт з утрыманнем алкаголю менш за 1,5%. Гэта дало пэўны штуршок да развіцця кампаніі падчас дзеяння «сухога закона». І такіх прыкладаў мноства. Сёння «Лідскага піва» таксама імкнецца выпускаць новыя прадукты і ўкараняць інавацыі, бо гэта жыццёва неабходна, калі мы хочам прыцягнуць спажыўцоў.
Адной з цікавых асаблівасцяў нашага прадпрыемства з’яўляецца new product development team, у склад якой уваходзяць дырэктар і ключавыя спецыялісты кампаніі. Поўны цыкл вываду новага прадукту на рынак займае амаль год. Тут важна ўлічваць магчымасці вытворчасці, разлічваць эканамічны эфект запуску. Мы пільна сочым за сусветнымі і айчыннымі трэндамі, вывучаем іх і толькі пасля гэтага прымаем рашэнне аб запуску таго ці іншага прадукта.
Такое дбайнае разважанне тлумачыцца простым фактам: да 80% беларускіх спажыўцоў — кансерватары, не гатовыя спрабаваць новыя прадукты, адзначыла кіраўнік аддзела маркетынгу Валянціна Багнія. Галоўны піўны выбар беларусаў — лагер, выводзіць іншыя групы прадуктаў доўгі час было няпроста і даволі рызыкоўна. У стартапаў і малога бізнэсу ў гэтым сэнсе значна больш магчымасцяў, бо ў іх меншыя аб’ёмы, а значыць, у выпадку няўдалага запуску, меншыя фінансавыя страты. Тым не менш «Лідскае піва» пастаянна абнаўляе свае лінейкі, прапаноўваючы спажыўцам зусім новыя і нетрывіяльныя прадукты. Напрыклад, кампанія была першай сярод буйных прадпрыемстваў піўной індустрыі Беларусі, запусціўшы лінейку крафтавага піва.
У апошнія гады намеціўся нязначны, але стабільны рост колькасці спажыўцоў, якім цікава спрабаваць навінкі. Акрамя гэтага трэнду ў фуд-індустрыі ёсць і некаторыя іншыя:
— Гаворачы пра інавацыі, можна разглядаць не толькі выпуск новых прадуктаў, адзначыла Валянціна Багнія. — Наватарства магчыма на ўсіх узроўнях: ад вытворчасці да маркетынгу. З улікам даволі строгага беларускага заканадаўства, у вытворцаў застаецца вельмі мала інструментаў для прасоўвання брэнда, маркетолагам раз за разам прыходзіцца прыдумляць нешта новае. Прычым гэта могуць быць як глабальныя інструменты (некалькі гадоў таму адна алкагольная кампанія выпусціла беларускамоўныя стыкеры для Viber, стаўшы сапраўдным наватарам у гэтым кірунку), так і зусім невялікія (напрыклад, ўпакоўка, мова, на якой напісана назва прадукта).
Валянціна Багнія таксама адзначыла, што «Лідскаму піву» патрэбныя стартапы, нестандартныя прадукты. — Верагодна, што наша кампанія прыме рашэнне не інвеставаць у вытворчасць складанага напою, а зробіць калабарацыю ці нават купіць нейкага вытворцу, — распавяла яна. Яшчэ адна магчымасць для стартапераў — прымяненне інавацый для прасоўвання, якія ляжаць у digital-сферы. Гэта могуць быць новыя рашэнні для рытэйла, звязаныя з тым, каб зрабіць прадукт больш прыкметным на рынку, інструменты, якія спрыяюць прасоўванню прадукта па тых каналах, дзе няма ракламы, а таксама прылады, якія дазваляюць збіраць базы дадзеных спажыўцоў. — Пакуль няма добра аўтаматызаванай сістэмы, якая не будзе марнаваць час карыстальнікаў і будзе даваць дадзеныя вытворцу. Але як толькі яна з’явіцца, мы ёй з радасцю скарыстаемся.
Вы збіраецеся наведаць сайт, на якім ёсць інфармацыя аб прадуктах, якія змяшчаюць алкаголь
Вам споўнілася 18 гадоў?
