Будаўніцтва ачышчальных збудаванняў – важкі ўклад «Лідскага піва» ў экалогію горада

Будаўніцтва ачышчальных збудаванняў – важкі ўклад «Лідскага піва» ў экалогію горада

Будаўніцтва ўласных лакальных ачышчальных збудаванняў  — гэта не толькі ўклад буйных прадпрыемстваў у экалогію горада, але і зніжэнне нагрузкі на гарадскія ачышчальныя збудаванні. Для «Лідскага піва» гэта маштабны праект, у якім задзейнічаны шмат супрацоўнікаў.

Мы папрасілі Паўла Розума, галоўнага інжынера прадпрыемства, расказаць пра будаўніцтва.
— Пачну з лічбаў. «Лідскае піва», адно з найбуйнейшых прадпрыемстваў горада, кожныя суткі скідае каля 2000 кубічных метраў вады. Для параўнання: адна кватэра спажывае каля 10–12 кубаметраў вады ў месяц. Вядома, такая нагрузка на гарадскую каналізацыйную сетку вельмі вялікая. Менавіта таму ў прадпрыемстваў павінны быць уласныя лакальныя ачышчальныя збудаванні  — каб разгрузіць гарадскую сістэму.

Асаблівасць будучых ачышчальных збудаванняў у тым, што працэс ачысткі сцёкаў будзе адбывацца з удзелам бактэрый.  У выніку будзе вылучацца біягаз, які плануецца збіраць і выкарыстоўваць як крыніцу энергіі. На станцыі прадугледжана ўласная кацельня: яна будзе працаваць на біягазе, атрыманым у працэсе ачысткі, і забяспечваць ацяпленне, а таксама падтрымліваць работу ўсіх ачышчальных збудаванняў.

Упершыню пра праект будаўніцтва ачышчальных збудаванняў у «Лідскім піве» загаварылі яшчэ ў 2020 годзе, але будаўніцтва распачалі толькі цяпер.

— Гэта аказаўся вельмі няпросты праект. Зараз растлумачу чаму. «Лідскае піва» знаходзіцца ў цэнтры горада, а будынкі на тэрыторыі прадпрыемства маюць статус гісторыка-культурнай каштоўнасці. Таму перад праекціроўшчыкамі стаяла задача, якая на першы погляд здавалася амаль невыканальнай. Праект прайшоў мноства праверак, перш чым набыў канчатковы выгляд. Ужо сёння можна сказаць, што новы будынак будзе самым высокім на тэрыторыі «Лідскага піва».

Будаўніцтва ачышчальных збудаванняў плануецца завяршыць да 1 снежня 2026 года. З 1 лютага абсталяванне запусцяць у тэставым рэжыме, а з 1 красавіка 2027 года станцыя ачышчальных збудаванняў пачне працаваць пастаянна,  у штатным рэжыме.

— На першы погляд можа здацца, што мы будуем чатырохпавярховы будынак для аднаго чалавека, — жартуе Павел Розум. — Сапраўды, для падтрымання працы сістэмы ачышчальных збудаванняў дастаткова аднаго супрацоўніка ў змену. Аднак праект прадугледжвае цэлы паверх офісных памяшканняў. Сюды пераедзе частка супрацоўнікаў нашых лабараторый: яны будуць кантраляваць стан вады і наогул адказваць за экалагічны кірунак на прадпрыемстве.

— Ці даводзілася вам сутыкацца з нечаканымі перашкодамі падчас будаўніцтва?

— Нечаканасці, вядома, здараюцца, гэта ж вялікі праект, вялікая будоўля. Але прыемней казаць аб нечаканых знаходках. Падчас будаўнічых работ былі знойдзены дзясяткі старажытных шкляных бутэлек з маркіроўкай завода Носеля Пупко. Усе артэфакты перададзены ў Музей лідскага бровара.