«Лідскае піва» запрашае беларусаў стаць аўтарамі аўдыягіда для гарадоў Беларусі

Ад 4 да 17 кастрычніка Музей лідскага бровара збірае цікавыя факты аб гарадах і мястэчках Беларусі, каб запісаць народныя аўдыяэкскурсіі па галоўных дарогах Беларусі. Аўдыягіды, складзеныя паводле гісторый жыхароў, будуць даступныя падарожнікам на маршрутах з Мінска ва ўсе абласныя гарады.

Колькі разоў мы праязджалі па адных і тых жа дарогах, не задумваючыся аб тым, як з'явілася назва якой-небудзь утульнай вёсачкі або якія легенды захоўваюць руіны за гарою. Неўзабаве месцы ўздоўж папулярных маршрутаў стануць крыху больш прыкметнымі і прывабнымі. Усё дзякуючы аўдыягідам, якія будуць суправаджаць падарожнікаў на ўсім шляху з Мінска ў абласныя гарады альбо назад.

Для таго, каб ператварыць звыклую дарогу ў паўнавартасны экскурсійны маршрут, Музей лідскага бровара аб'яднаўся з Фэстам экскурсаводаў - найбуйнейшым фестывалем краязнаўцаў і экскурсаводаў. А для таго, каб даведнік быў займальным і эмацыйным, запрасіў стаць яго аўтарамі ўсіх захопленых гісторыяй беларусаў. Далучыцца да каманды і нанесці на аўдыяёмапу любімыя месцы можна ад 4 да 17 кастрычніка. Для гэтага трэба:

1. запусціць телеграм-бот @TravelBrovar_bot;
2. выбраць адзін з пяці напрамкаў для экскурсій: з Мінска ў Гародню (праз Ліду), у Віцебск, у Магілёў, у Гомель альбо Брэст;
3. адзначыць вядомы вам населены пункт на маршруце;
4. падзяліцца добрай гісторыяй: энцыклапедычным фактам, гарадской байкай або асабістым топам славутасцяў. Чат-бот прымае тэкст, фота і галасавыя паведамленні.

Калі гісторыі будуць сабраныя, арганізатары перададуць іх партнёрам з Фэста экскурсаводаў для апрацоўкі і запісу. Голасам народных аўдыягідаў стане Мікіта Моніч, адзін з самых харызматычных экскурсаводаў краіны. Зусім нядаўна Мікіта запусціў свой уласны канал пра беларускую культуру, а цяпер ён агучыць займальныя гісторыі пра дзясяткі гарадоў па ўсёй краіне.

«Наведванне нашага музея ў Лідзе, несумненна, стане святам для гасцей. У музеі мы будзем распавядаць пра гісторыю беларускага піваварства і, вядома, горада Ліды. Пакуль ідзе падрыхтоўка да адкрыцця музея, мы вырашылі расказаць аб дзясятцы менш вядомых, але ад гэтага не менш важных для наведвання гарадоў, — растлумачылі ў ААТ «Лідскае піва». — Усе, хто дапамогуць у стварэнні аўдыяэкскурсій сваімі гісторыямі, атрымаюць бясплатныя квіткі ў Музей лідскага бровара і магчымасць аднымі з першых ацаніць аўдыягід на маршруце з Мінска ў Ліду».

Плануецца, што экскурсіі з'явяцца ў свабодным доступе на сайце https://travel.lidskae.by як раз да адкрыцця музея. Музей лідскага бровара размяшчаецца на тэрыторыі гістарычнай часткі завода ААТ «Лідскае піва» ў Лідзе, на вуліцы Адама Міцкевіча. Аб адкрыцці музея будзе паведамлена дадаткова.